ചാരുകസേര

ചാരുകസേര

വീടിൻറെ ഉമ്മറചാരുകസേര-

യിൽ അച്ഛൻ ഇരിക്കുന്നുണ്ടാവാം  

തീതിന്ന ബാല്യവും ബാന്ധവവേർ-

പാടും ഓർമ്മയിൽ ഓടുന്നുണ്ടാവാം

കായലിനക്കരെ മാമരത്തോപ്പുകൾ

വീശിവരുന്നൊരു കാറ്റിൽ

കാണാറുണ്ടച്ഛൻ അറിയാതുറങ്ങും

ആചാരുകസേരയിൽ സാന്ദ്രം

അങ്ങോട്ടും ഇങ്ങോട്ടും ഓടും

തിരക്കിൽഞാൻ ഓർക്കാറുണ്ട്

എന്തേ അച്ഛൻറെ പണ്ടത്തെ

കഥകൾ കേൾക്കാറില്ലൊന്നും?

കൂട്ടുകാരൊക്കെ പോയതിനാലോ

കൂടുതൽ മിണ്ടാട്ടമില്ലാതിരിക്കേ

കൊച്ചുമക്കൾമാത്രം കേൾക്കാറു-

ണ്ടച്ഛൻറെ ധർമ്മാധർമ്മവിലാപം

വീടിൻറെ ഉമ്മറചാരുകസേര-

യിൽ അച്ഛൻഇരിക്കുന്നുണ്ടാവാം

നേരമിരുണ്ട് ഞാൻ വീടെത്താൻ എന്തേ

വൈകിയതെന്നില്ലോരു ചോദ്യം, എന്നാലും

ദൂരത്തുനിന്നു ഞാൻ കാണാരുണ്ടച്ഛൻ

കാത്തു വേലിക്കൽ നില്ക്കുന്നതായി

വീടെത്തുമ്പോഴോ - ഒന്നുമറിയാതെ

വീണ്ടും ചാരിഇരിക്കുന്നകണ്ടാൽ

ഓർമ്മയിലാണെന്നഭാവം എങ്കിലും

കാണാം മായുന്നൊരു  മൗനശകാരം

വീട്ടിൽ വരാറുള്ളെൻ ചങ്ങാതിമാ-

രോക്കെ അച്ഛനെ കാണാറുണ്ടത്രേ

ഞാനറിയാതെൻ കാര്യവിശേഷങ്ങൾ

അവരോടു ചോതിക്കുമായിരുന്നത്രേ

കായലിനക്കരെ മാമരത്തോപ്പുകൾ

വീശിവരുന്നൊരു കാറ്റിൽ, മാമക

ചാരുകസേരയിൽ ഞാനിരിക്കുമ്പോൾ -

എല്ലാം ഓർമ്മകളാണ്ണെന്നുമാത്രം!

Penned in February 2016, in memory of singer Bibinkumar's Late father who lived in Palluruthy, Kochi.

Copyright retained by the author

©Sujit Sivanand