Poem: Poomottukal (Flower Buds)

- പൂമൊട്ടുകള്‍-

( ഒരു ഊട്ടു പാട്ട് )

അമ്മയുടെയും  നമ്മെ വിട്ടുപോയ എല്ലാ അമ്മമാരുടെയും ഓർമ്മക്കായ് 


പ്രമേയം: ഒരു അമ്മയും കുട്ടിയും തമ്മിലുള്ള സംവാദമായി ഒരുക്കിയ ഈ പാട്ടിന്‍റെ പശ്ചാത്തലം അഞ്ചു ബാല്യ സങ്കല്‍പ്പങ്ങളായ - ഭൂമി, ചന്ദ്രന്‍, സൂര്യന്‍, അച്ഛന്‍, അമ്മ എന്നിവയും, അവയ്യില്‍കൂടി നേടുന്ന ഭാവാനുഭവങ്ങളും, ആ അനുഭവധാര തന്നെ ആറാമതായി തന്‍റെ ഗുരുവായി അറിവായി തന്നില്‍ വിളങ്ങുന്നു.  ഈ ഊട്ടുപാട്ടില്‍ക്കൂടി അമ്മ കുട്ടിക്ക് അറിവും മൂല്യങ്ങളും പകരുന്നു.


 

അമ്മ:	ആരിയന്‍ നെല്ലിന്‍റെ ചോറു തരാം അന്നത്തിന്നപ്പുറം  പാടിത്തരാം അമ്മയീ  താലത്തില്‍ വച്ചിരിപ്പൂ പൂമൊട്ട്  പോലഞ്ചുരുളമാത്രം
അമ്മ:	ഒന്നാനാം പൂമൊട്ടിതാര്‍ക്ക്  വേണ്ടി? ഒക്കെയും തന്നോരു ഭൂമിക്കല്ലേ? ഒപ്പവുമുള്ളൊരു ദേവിക്കല്ലേ?
ഉണ്ണി:	ഒന്നാനാം പൂമൊട്ട്  ഭൂമിക്കല്ലോ ഭൂമിയും ദേവിയും ഒന്നാണല്ലോ
അമ്മ:	രാമാനം കാക്കുന്ന ചന്ദിരനോ? രാപോയി പാക്കുന്ന തിങ്കള്‍മീനോ? രണ്ടാനാം പൂമൊട്ടിതാര്‍ക്ക് വേണ്ടി?
ഉണ്ണി:	രണ്ടാനാം പൂമൊട്ട് ചന്ദിരന് ചന്ദിരനാണല്ലോ തിങ്കള്‍മീനും
അമ്മ:	മൂവന്തി ചോപ്പിച്ച ഭാനുമാനോ? മുല്ലപ്പൂ മഞ്ഞിലെ ഭാസുരനോ? മൂന്നാനാം പൂമൊട്ടിതാര്‍ക്ക്  വേണ്ടി?
ഉണ്ണി:	മൂന്നാനാം പൂമൊട്ട്  ഭാനുമാന് ഭാനുമാനാണല്ലോ ഭാസുരനും
അമ്മ:	നല്ലോല കെട്ടി പൂപ്പന്തു തട്ടാം നാലാമന്‍ പൂമൊട്ടിതാര്‍ക്ക് വേണ്ടി?
ഉണ്ണി:	നല്ലോരു നാളിനായ്‌ വേലചെയ്യും നല്ലചഛനായിതു  മാറ്റിയാലോ?
അമ്മ:	ഇല്ലില്ല ഉണ്ണിക്കു ശക്തി വേണം   നല്ലോല കെട്ടി പൂപ്പന്തു തട്ടാന്‍
അമ്മ:	ആകെ വിശക്കുന്നു അമ്മക്കിപ്പോള്‍ അഞ്ചാമന്‍  പൂമൊട്ടിതാരെടുക്കും?
ഉണ്ണി:	ആകാശത്തേക്കമ്മ നോക്കിനില്‍ക്കൂ ആരാരാ പൂമൊട്ട്  കൊണ്ട്പോകും?
അമ്മ:	കാക്കത്തിയാണോ പൂച്ചത്തിയോ അഞ്ചെല്ലാം പൂമൊട്ടും കൊണ്ടുപോയി!

©Sujit Sivanand